Fyresdal

Om

Når du besøker Fyresdal er du omgjeven av natur på alle kantar. Vi har plante- og dyreliv som spenner frå det ein elles finn ved kysten, til den typiske høgfjellsnaturen. derfor oppmodar vi deg til å bruke mykje av tida di ute. Naturen er ekte, uforfalska, variert og typisk norsk – og inviterer til utandørs aktivitetar.

Vi vil her presentere ulike alternativ slik at du på eiga hand kan utforske vår flotte natur.

Vandreturar
Fyresdal tilbyr eit stor utval av vandreløyper gjennom skogane, opp på fjelltoppane og innover heia. Eit stort nettverk av merka stigar med ulik vanskegrad gjer at det finst spanande val for dei fleste som ønskjer og kome seg ut på tur. Du kan også vere med på dei organiserte vandreturane.

Padling og sykling
I Fyresdal finn du eit eldorado av små og store vatn og innsjøar – særs veleigna for padling. Blant desse er Fyresvatn, som med sine 377 meter er ein av Noregs djupaste innsjøar. Bygda eignar seg også godt for sykling, anten du vel ei rute nede i dalen, eller om du har terrengsykkel og tek deg ein meir krevjande tur innover heia.

Plukke skogsbær
Skogane i Fyresdal er rike på bær. Dei mest vanlege bæra er blåbær, tyttebær, bringebær og molte. Alle desse veks i skogane eller innpå heia, og er som regel klare for å bli plukka seint om sommaren eller tidleg på hausten. Nyt den friske smaken av norsk natur!