Boklansering og minnemarkering for Myllarguten

Om

I år er det 150 år sidan den sagnomsuste spelemannen Myllarguten døydde. Torgeir Augundsson (1799 el. 1801-1872) var fattigguten frå Telemark som blei ei nasjonal legende på hardingfele, godt hjulpe av den berømde fiolinisten Ole Bull.

Laurdag 2. juli blir det ei minnemarkering med musikk og boklansering på Vest-Telemark museum Eidsborg.
Annfrid Berget Haukeland står bak ei ny bok om storspelemannen. «Myllarguten - Livet, legenden, medspillerne» kjem ut på Dreyers forlag. Gamle og nye kjelder er samla, finkjemma og sett saman på ny i ei biografisk framstilling.

Dette er Annfrid Berget Haukelands fyrste bokutgjeving. Ho har ein master i filosofi og er etterkommar av Myllarguten.
Under arbeidet med boka har Haukeland fått god hjelp av folkemusikar og kulturnestor Knut Buen. Han vil fortelje og spele slåttar etter Myllaren under arrangementet. Det vil også den kjende spelemannen og felemakaren Ottar Kåsa. Vidare vil formidlingsansvarleg på VTM, Tilman Hartenstein, fortelje om arbeidet som er gjort i høve formidling på Myllarheimen i Arabygdi. Arne Vinje leier gjennom programmet.

Annfrid vil presentere boka og signere, og me sel bøkar etterpå. Samtidig vil me syne NRK-filmen «Myllarguten - eit liv i dur og moll og fatigdom» for dei som har lyst til å sjå.

Denne dagen serverar kjøkenet vårt mellom anna kost frå Myllaren si tid – sild, jordeple og kålrotstuing.
OBS: Det er matservering fram til kl. 16.00.

Frå kl. 15:30 vil Falkeriset folkemusikklag spele slåttar i foajeen.

Velkomen!
Inngang: 200,-