Telemarkfestivalen 2023 | Yagody + Steve'n'Seagulls

Om

– Kvar augneblink i ein person sitt liv har sin eigen song, seier Zoryana Dybovska som grunnla Yagody i 2016 i den vestukrainske byen Lviv saman med tre andre kvinner. Dei fire kvinnene reiste så på kryss og tvers av Ukraina for å utforske dei mange musikalske tradisjonane landet har.

I kjølvatnet av denne reisa har Yagody tilegna seg eit enormt repertoar av rytmar, poesi og melodiar om kjærleik og store og små ting i livet. Gruppa har henta òg eit mangfaldig utval av folkemusikk frå andre land, til dømes Serbia, Makedonia og Bulgaria, og slik har gruppa skapt sitt heilt unike uttrykk.

Med Yagody kan ein forvente ei gruppe unge kvinner med  fortryllande nærvær, nydelege stemmer og stor stemning. Telemarkfestivalen er glade for å kunne presentere det som garantert vert ei fantastisk konsertoppleving for både Midt-Telemarkingar og det store talet flyktningar som har kome til Midt-Telemark som følgje av krigen i Ukraina.

Medverkande:
Zoryana Dybovska – vokal
Sofia Leshishak – vokal, djembe
Valeria Mocharska-Lyulchyk – vokal, perkusjon
Tatiana Voitov – vokal, bayan
Timur Gogitidze – perkusjon
Vadym Voitovych – bass

Klassiske rockelåtar i blågras-drakt
Steve'n'Seagulls frå Finland er kjend for spinnville konsertar der dei kler klassiske rockelåtar i ei fantastisk fengande blågras-drakt. Bandet starta med å spele inn låtar som dei publiserte på YouTube. Dei fekk stor merksemd og derifrå gjekk vegen fort til platekontrakt og konsertar over heile verda, og dei har ein enorm mengde fans! Om ein skal leggje talet på følgjarar på Facebook til grunn, så er Steven'n'Seagulls det klart største bandet som har vore på Telemarkfestivalen nokon gong. Her vil du mellom anna få høyre Iron Maiden sin «The Trooper», AC/DC sin «Thunderstruck» og Led Zeppelin sin «Black Dog» slik du aldri har høyrt dei før!
Med Steve'n'Seagulls vandrar tankane fort over til den hardbarka actionskodespelaren Steven Seagal som redda verda mange gonger på 90-talet. Steven Seagal kjem ikkje til Telemarkfestivalen, men det gjer Steven'n'Seagulls – og dei er minst like tøffe!

Medverkande:
Remmel – vokal, akustisk gitar, balalaika, mandolin
Skubu – Trommer, perkusjon, vokal
Jamppa – kontrabass, vokal
Hiltunen – trekkspel, kantele, mandolin, tangentar, fløyte
Herman – banjo, akustisk gitar, vokal

Obs! Få med deg heile konsertkvelden i amfiet - kjøp Heilaften-billett!