Familiedag i Eidsborg 2023

Om

Den årlege Familiedagen på Vest-Telemark Museum i Eidsborg har også i år opplevingar og aktivitetar for heile familien. Museumsbonden Daniel køyrer hest og vogn, og han og kona Lisa fortel om drifta og livsstilen sin til dei som er interesserte i økologisk jordbruk.

Dei yngste kan drive skattejakt i den store sandkassa, eller sluse i kanalparken. Langbogeskyting er også populært, og det er laftesett til dei som vil lage hytte. David Hauer har rigga til urmakarverkstad, medan samlingsavdelinga på museet har laga ein kunnskapstest, og her blir det premiering. 

Botnedalsprosjektet
Klokka 13.00 er det avduking av «Neslandsportalen» som er fullføringa av Botnedalsprosjektet som Tokke Historielag starta i 2019. Vest-Telemark museum fekk seinare ansvaret for å lage kopi av portalen til denne kyrkjedøra. Ansvarleg for prosjektet til historielaget, Ingrid Grøstad Johnson, vil fortelje om interessa for Botnedalen og den gamle kyrkja der. Mellomalderballadar var ei av drivkreftene, sidan Ingrid har stor interesse for gamle folkeviser. Ho vil saman med eit barnekor framføre ein ballade som minner om tida.

Direktør Dag Rorgemoen vil fortelje korleis prosjektet blei vidareført av museet med å lage ein kopi av porten til kyrkjedøra. Håkon Fjågesund har laga døra, og Steven Carpenter og Johannes Barstad har utført smedarbeidet. Modellen av denne vakre kyrkjedøra frå Botnedalen er tidlegare presentert. Ho står utstilt på museet i Eidsborg.
Nå er det siste del av Botnedalsprosjektet, kalla «Neslandsportalen», som blir avduka. Portalen skal fungere saman med kopien av kyrkjedøra. Vi får sjå resultatet og helse på handverkarane som står bak. Anders Kvaale Rue har deltatt med teikningar, elevar og lærar frå Hjerleid skule og handverkssenter på Dovre har laga porten og treskjeringa med same type verktøy som blei bruka på originalane. Rektor Helle Hundevadt kjem saman med sine faglærarar Even Slette Hansen og Thom Kelly og tre elevar for å montere portalen og fortelje om arbeidet.

Etter avdukinga skal smeden Steven Carpenter frå Labromusea, som ligg under Buskerudmuseene på Kongsberg, vere i smia på museet og vise fram eigne produkt og svare på spørsmål.

Lansering av ny bok frå lokalmiljøet
Professor Olav Solberg vil fortelje om balladesongerska Tone Høna frå Lårdal og den tragiske lagnaden hennar. Boka han har skrive om Tone Høna har i høgste grad lokal interesse, og ein kan denne dagen snakke med forfattaren og kjøpe boka med namnet «Tones tragedie».

Juvestoga og «Juvekongen»
Neste hovudpost på programmet er orientering om Juvestoga og «Juvekongen» ved Tarjei Førstøyl. Stoga frå 15-16-hundretalet vart flytt til museet frå Øyfjell. Her budde Olav Halvorsen, fødd 1753, seinare kalla «Juvekongen. I 1993 gav Støttelaget for Øyfjell Bygdemuseum ut soga om «Juvekongen» og stoga hans, skriven av Tarjei Førstøyl, og vi vil minne om denne soga.
Stavkyrkja er open til faste tider der omvisarane fortel.

Museumskafeen har servering med middag, men ver ute i god tid!

Velkomen til å oppleve mellomalderen på familiedagen og møte dei som fører arven vidare.

Inngang: vanleg museumsbillett.