Olav sine draumar – ei akustisk utstilling om Draumkvedet

Om

Den velkjende mellomalder-balladen Draumkvedet blei oppdaga og skrive opp i Vest-Telemark midt på 1800-talet. Songarane var for det meste eldre kvinner, busett i det som i dag er Vinje, Tokke, Kviteseid og Seljord kommunar. Det er difor naturleg at Vest-Telemark Museum syner ei permanent utstilling om kvadet, som del av folkekunstutstillinga ved museet i Eidsborg.

Ingen veit kor gamalt Draumkvedet eigentleg er, men dei fleste forskarar trur at den har oppstade i tida etter Svartedauden, sannsynleg i andre halvdel av 1300-talet. Det finst ingen kjelder før oppdaginga på 1800-talet, og då hugsa songarane berre delar av det opphavlege kvadet. Difor er hovuddelen av vår utstilling akustisk – ei oppleving i lyd, akkurat slik Draumkvedet var gjennom mange hundre år.

I utstillinga kan ein høyre heile Draumkvedet (i versjon etter Maren Ramskeid frå Brunkeberg) sunge av Ellen Nordstoga og Halvor Håkanes, i nye opptak gjort i Eidsborg stavkyrkje. Inne i eit eige lytterom kan ein oppleve eit heilt nytt verk i fleirkanal (surround) lyd, laga av den norsk-britiske komponisten Natasha Barrett. Nokre tekstar fortel om korleis songen vart oppdaga, og korleis den blei oppfatta av folkeminnegranskarane.

Inne i lytterommet kan du sjå små utsnitt frå Torvald Moseid sitt vidgjetne 50 meter lange Draumkvedet-teppe.

Og vil du sjå fleire bilete frå den dramatiske forteljinga om draumen til Olav Åsteson, kan du reise til Grimdalstunet  i Skafså, der målaren Karl Erik Harr sin Draumkvede-serie frå 1990-talet er stilt ut.

Her kan du lese meir om utstillinga i Eidsborg og historia til Draumkvedet, samt teksten slik den blei skrive opp etter Maren Ramskeid – som den mest fullstendige versjonen me kjenner til.