Jol m.m. – konsert med Kjetil Flatland

Om

Enno ein gong har me gleda av å kunne invitere Kjetil Flatland og Helge Wahl Flatland til å halde førjulskonsert i Gransherad kyrkje! Mange fekk oppleve deira nydelege konsert i 2019, og etter ein lang periode med smitteverntiltak håpar me at enno fleire vil finne vegen til kyrkja denne kvelden.

Telemarkingen Kjetil Flatland er etter kvart eit kjent namn for mange. Med sine to albumutgjevingar har han hausta brei anerkjenning som musikar og songskrivar. «Jeg har umiddelbart fått meg en ny favoritt», skreiv Tor Hammerø i Nettavisen, og Nrk P1 trilla terningkast 5 for albumet «Hyttetankar». Kjetil Flatlands filosofiske og livanskuande viser – ofte med naturen som kulisse – appellerer til fleire generasjonar, og eit stadig aukande publikum får øyrene opp for songaren og saksofonisten frå Seljord.
Hans slektning og mangeårige makker Helge Wahl Flatland er ein anerkjent og mykje bruka musikar. Med sitt kjenslevare og virtuose spel tryllar han fram harmoniar og melodiar, som underbyggjer og framhevar tekst og stemningar.
I Gransherad kyrkje sondag 28.november kl 19 serverer Flatlandkarane kjente og kjære julesongar ispedd folketonar og eigenkomponert musikk i ei perle av ein konsert, som med rette blir kalt «Jol m.m.».
Me håpar mange nyttar høvet til å få med seg dette – velkomen!


Billettar i døra: 200,-. Me tek Vipps og kontant.