Løynde lydar frå Vest-Telemark - Opning av lydinstallasjon

Om

I april 2022 vitja komponist Natasha Barrett og fotograf Gudrun Kristine Tjønnhaug Semons fleire plassar i Fyresdal, Tokke og Vinje. Dei lytta, tok opp lyd og fotograferte det dei fann. Natasha undersøkte opptaka med spesielle verktøy for å finne fram til gøymde lydaspekt. Så laga ho sju komposisjonar som ein kan sjå på som «lydlege postkort».

Vest-Telemark museum har no bygd ein spesiell installasjon på museet i Eidsborg der publikum kan lytte til «postkorta» og sjå fotografia gjennom ein «tittevegg».

Komponisten og fotografen vil vere til stades og fortelje om sitt arbeid med installasjonen. Dei sju korte lydverka vil bli presentert og spela for publikum, før installasjonen blir opna.

Installasjonen er del av lydkunstprosjektet «Reconfiguring the Landscape» som Noregs musikkhøgskule står bak. Målet er å utforske korleis ein kan lytte til kulturlandskap og kvardagslyd på nye og spanande måtar. Prosjektet er støtta av direktoratet for internasjonalisering og kvalitetsutvikling i høgare utdanning (DIKU).

Velkomen til ei fin lydoppleving!