Lyden av Draumkvedet

Om

Sundag 5. januar presenterer VTM Eidsborg si nye og permanente utstilling om Draumkvedet, mellomalder-balladen som blei funne og skrive opp i øvre Telemark etter 1840. Songarane var for det meste kvinner, bosett i Kviteseid, Tokke og Vinje.

I samband med dette blir det konsert i Eidsborg stavkyrkje, der folkesongar Ellen Nordstoga og lydkunstnar Natasha Barrett framfører Draumkvedet i ein ny, til no uhøyrt versjon med song og live-elektronikk. Etter konserten blir det presentasjon av utstillinga.

Utstillinga består mellom anna av ein lydinstallasjon laga av Natasha Barrett, basert på opptak av Draumkvedet etter Maren Ramskeid, sunge i Eidsborg stavkyrkje av Ellen Nordstoga og Halvor Håkanes.

Natasha Barrett er ein engelsk-norsk komponist som har arbeidet mykje med lydkunst og lydlege installasjonar. Ho er også professor ved Noregs Musikkhøgskule. Ellen Nordstoga er folkesongar og kulturarbeidar frå Vinje. Ho har sunge Draumkvedet i fleire tiår i inn- og utland. Halvor Håkanes er sylvsmed og songar og har m.a. turnert med «Draumkvedet» i USA.

Draumkvedet-utstillinga i Eidsborg kan opplevast i "rørleg" fleirkanals lyd gjennom 17 høgtalarar i eit spesialdesigna lytterom ved museet. Der kan ein også sjå utsnitt av Torvald Moseid sitt 55 m lange Draumkvedet-teppe frå 1993.

Her kan du lese meir om Draumkvedet, og høyre lyd frå den nye utstillinga.

Lytterommet og Draumkvedet blir ein fast del av folkekunstutstillinga ved museet i Eidsborg som er tilgjengeleg for publikum frå 1. mai til midten av september kvart år.

Men lanseringa er altså dagen før 13. dag jol, 5. januar - for 6. januar er dagen då Olav Åsteson/Åknesson vakna frå sin "sterke svevn".

Vanleg museumsbillett kr 100,-

Tilbod: Dei som kjøper årskort for 2020 får gratis inngang.

Velkomen!