Rui-jentene i ny versjon

Om

Etter å ha reist med teaterforestillinga om Rui-jentene sidan mai 2018 og spela for over 10.000 publikumarar, har desse jentene endeleg vore i Oslo att med ny-premiere på Riksscenen – over 60 år etter at Kong Olav inviterte dei til Slottet då han las Knut Eidems artikkel om dei i Dagbladet – og jentene blei rikskjendisar!

Historia om dei to små systrene Ingerine og Gurine Schevenius, frå den vesle plassen Rui på Dalen i Telemark, som kom til kongen, var kjend og kjær i si samtid, og ho vekker framleis gjenklang hos mange. Ingerine og Gurine fann glede i det enkle livet på Rui. Sjølv om dei hadde midlar til å gjera arbeidet lettare, levde dei etter sin fars filosofi om nøysemd. Kva er det me moderne menneske ikkje kan sjå, men som dei så klart og tydeleg såg, der dei streva og arbeidde oppe på sitt vakre, men akk så enkle og gamaldagse Rui? Og korleis blir to syskjen forma av kvarandre etter å ha levd eit langt liv i tosemd, og i gjensidig avhengnad?
I førestillinga får ein møte Ingerine og Gurine, og ta del i deires liv. Ein møter dei heime på Rui, i friskt samspel med publikum i salen, og får vera med på den store reisa frå Dalen til Oslo. Me ynskjer å gje publikum eit nært, varmt, og ekte møte med Ingerine og Gurine, eit møte fylt med humor, og til undring og ettertanke.

I nyversjonen har me hatt god hjelp av koreograf Indra Lorentzen og ikkje minst folkemusikar Erik Sollid – kjend frå m.a. Valkyrien Allstars og med røter frå Morgedal. Han spelar både feler og radio og er ein aktiv medspelar i forestillinga. Me tør påstå at historia om Rui-jentene har fått ein ny dimensjon!

Ingerine: Hæge Manheim / Gurine: Inger Merethe Johnsen
Regi: Sylvia Salvesen / Koreografi: Indra Lorentzen / Musikar: Erik Sollid
Manus i samarbeid etter ein idé av Teater Fabel v/Inger Merethe Johnsen.