Eva Bull Holte vart fødd 15. januar 1922. og døydde 15. februar 1993.  Ho er gravlagd ved  Åmotsdal kyrkje. Eva voks opp i ein heim der interessa for biletkunstvar stor. Blant familiens omgangskrets var det fleire kunstnarar og på veggane hang det bilete av Edward Munch, Ludwig Karsten og Bernhard Folkestad. Faren Carl Albert Bull hadde vore godt i gang med bilethoggarutdanning då han endra kursen og byrja ei legekarriere i staden. Familien busette seg på Gjøvik der faren var med på å bygge opp Gjøvik sjukehus. Han døde då Eva var 11 år og etter at familien flytte til Oslo fem år seinare,  bestemde Eva seg for å gå kunstnarvegen.
 

Eva Bull Holte starta utdanninga si ved keramikkavdelinga på Statens Håndverks- og Kunstindustriskole i Oslo (1940-44) og vart i 1944 kunstnarleg leiar på ein liten keramikkfabrikk ved Sarpsborg. Det var på denne tida ho traff ingeniøren Johan B. Holte frå Notodden. Dei gifte seg i 1944.

Etter krigen vart Eva elev ved kunstakademiet i Oslo der ho studerte måleri. Blant lærarane ho hadde var Per Krohg og Jean Heiberg som sjølv hadde vore elev hjå den kjende franske kunstnaren Henri Matisse. Eva vart opptatt av  dei franske modernistane med Paul Cezanne som eit sterkt førebilete.

I 1948 fekk Johan B. Holte ny jobb som førte til at paret flytta til Frankrike. Eva fekk kontakt med kunstnarmiljøet i Paris og vart elev ved Ecole des Beaux Artes og studerte grafikk hjå litografen M. Chedon.

Etter opphaldet i Paris flytta Eva og Johan tilbake til Notodden og på 1950-talet kjøpte ekteparet husmannsplassen Sneie i Åmotsdal. Der samla dei etter kvart fleire gamle lafta hus i tillegg til dei som sto der frå før. Seinare busette dei seg på Blommenholm utanfor Oslo, men pendla mellom Telemark og hovudstaden. Eva hadde atelier og gode arbeidsforhold på Sneie og var svært knytt til staden. Etter Evas bortgang bestemde Johan seg for å bygge eit museum for kunsten til Eva. Museet vart plassert på Sneie og innvigd  i 1999.

Om Evas kunst
 

Kunstsamlinga på Sneie viser keramiske arbeid, teikningar, grafikk og måleri. Eva er mest kjend for sine landskapsmåleri med ein stram og fast komposisjon og ein begrensa fargepalett. Ho fann sine motiv både ute i Europa, i Danmark, Storbritannia, Spania, og heime i Norge. I dei siste åra var det Telemark og særleg fjellheimen i Åmotsdal som gjekk att i bileta hennar.

Eva Bull Holte var ein anerkjend kunstnar i si samtid og er mellom anna representert i Nasjonalmuseet/Museet for samtidskunst og Bergen billedgalleri/Kode. Ho er innkjøpt av Kulturrådet og utanriksdepartementet og Norges bank. The National Museum of Women in the Arts i Washington D.C. og Collection Leon Hess i New York har kjøpt inn verk av Eva Bull Holte.
 

Del siden på Facebook