Kunstlåven i Seljord: Sommarutstillinga 2025

Om

Sommarutstillinga 2025 på Kunstlåven i Seljord

Seljord Kunstforening inviterer til ein mangfaldig og innhaldsrik sommarutstilling på Kunstlåven sommaren 2025.
Hovudutstilling: NK Sør-Norge 50 år
Årets hovudutstilling er eit samarbeid med Norske Kunsthåndverkere Region Sør, som i år feirar sitt 50-årsjubileum.
Utstillinga er kuratert av styret i NK Sør-Norge – Linn Obrestad, Katrine Bragdø, Siri Berquam og Rita Lysebo Egren – og viser verk av ti kunstnarar frå regionen. Deltakarane er valde ut etter ein open utlysning og representerer eit breitt spenn i uttrykk, fagfelt, alder og geografisk tilknyting innan regionen, som dekkjer Vestfold, Telemark og Agder.
Målet er å trekkje linjer mellom det materialbaserte kunsthandverket og det tradisjonelle handverket som har prega regionen gjennom fem tiår.
Deltakande kunstnarar: Regien Cox, Brita Been, Hilde Iren Dølheim, Tuva Gonsholt, Irene Haslum, Vilde Eskedal, Elisabeth von Krogh, Barbro Hernes, Arnfinn Strand og Sverre Tveito Holmen.
I samband med opninga blir det arrangert både seminar, opningsprogram og kunst- og kulturreise i samarbeid med NK Sør.

Minneutstilling: Knut Flatin
I år ville Seljordskunstnaren Knut Flatin fylt 80 år den 7. juli. Vi heidrar hans kunstnarliv med ei retrospektiv utstilling som viser arbeid frå heile karrieren – inkludert fleire verk som aldri tidlegare har vore viste for publikum. Utstillinga er eit samarbeid mellom Seljord Kunstforening og familien Flatin.

Temautstilling: Korgtradisjonar i Noreg
I samarbeid med Seljord Husflidslag viser vi ei utstilling basert på arbeidet til Hege Aasdal, handverksstipendiat ved Norsk Håndverksinstitutt. Her får du sjå korghandverk frå heile landet, i eit mangfald av materialar og teknikkar.

Opningstider: kvar dag i juli kl. 11:00–17:00