Norsk Skieventyr 30 år – med gjesteføredrag av Thor Gotaas

Om

Me markerar Norsk Skieventyrs 30-årsjubileum, og er så heldige å få besøk av sjølvaste Thor Gotaas i samband med arrangementet!

26. november 1993 opna Norsk Skieventyr i Morgedal – dagen før fakkelstafetten til Lillehammer-OL starta frå Øvrebø, fødestaden til skipionéren og morgedølen Sondre Norheim.

Ideen var at Norsk Skieventyr skulle vere eit opplevingssenter, der skihistorie ville bli formidla med spanande, audiovisuelle verkemedel. Bygget åleine kosta 22 millionar og var eit spleiselag mellom privatpersonar, kommunar i Telemark, fylkeskommunen og Disktriktenes utviklingsfond. Prosjektet var eit dristig forsøk på å setje Morgedal og Telemark på kartet i samband med OL og fakkelstafetten. Den økonomiske risikoen var stor og senteret gjekk nesten konkurs både før og etter opning. Alt i 1994 blei Skieventyret slått saman med det godt etablerte Olav Bjaaland-museet, og den audiovisuelle løypa blei erstatta med ei meir museumsfagleg kuratert skihistorisk utstilling. Dyktige fagfolk bidrog til at Skieventyret i dag er eit fullverdig skimuseum, der ein framleis kan oppleve nokre av dei audiovisuelle høgdepunkta frå 1990-talet.

Vest-Telemark museum markerer 30-årsdagen med ei tilstelling med følgjande program:

Velkomen ved Norsk Skieventyr A/S, ved styreleiar Tarjei Gjelstad
«Bygda der OL-entusiasmen starta». Orientering om arbeidet med jubileumsutstillinga 2024, ved formidlingsansvarleg hjå VTM, Tilman Hartenstein
Helsing frå Jakob og Anne Grete Dyrkolbotn
«OL-floka» - allsong med Einar Heggtveit
«Moderne skihopping starta i Telemark – hoppsporten og bakkenes historie frå 1800-talet fram til i dag». Føredrag ved forfattar Thor Gotaas

Thor Gotaas er folkeminnegransker og forfattar. Han har utgjeve over 45 kulturhistoriske bøkar med folkloristisk vinkling, og er ein etterspurt føredragshaldar. Gotaas har halde langt over tusen føredrag, og er mykje brukt som skihistorikar i NRK og andre kanalar, og som gjest i ulike podkastar. 

Bjaaland bygderestaurant / Kantina til Bjaaland serverer middag frå kl. 14. Mat er ikkje inkludert i billettprisen.

Inngang arrangement med føredrag: kr 200,-

(Foto/omslag: Magnus Kinapel/Gyldendal)