Oppstart av stadnamnprosjektet i Seljord

Om

Kva veit du om gamle stadnamn? Visste du at dei gamle stadnamna fortel ei historie og om ein levemåte som er ein viktig del av vår kulturarv? Dei gamle stadnamna har tradisjonelt gått i arv gjennom munnleg overlevering. I dagens samfunn er me ikkje like avhengig av desse namna for å drive gardsbruk og orientere oss, me har moderne hjelpemidlar og ein annan bruk av natur og landskap. Difor blir mange av namna gløymd. Denne utviklinga ynskjer me å snu.

Seljord sogelag, Åmotsdal sogelag, Seljord mållag og Vest-Telemark museum inviterer deg til å vere med på stadnamnprosjektet som byrjar med denne samlinga på Seljord bibliotek. Målet er å bevare stadnamna ved å samle inn og registrere dei i ein nasjonal namnedatabase som Språkrådet eig. For å få fullføre prosjektet treng me mange friviljuge.

Om du er nyfiken og interessert bør du koma til biblioteket den 15. oktober. Då blir det innføring i prosjektet, og samtale om korleis me kan jobbe saman for å få til eit godt resultat. Gode samtaler om eit interessant tema, og sosial hygge er hovudfokus. Kaffi og noko å bite i blir det sjølvsagt også. Alle er velkomne, uansett alder og nivå på namnekunnskap!

Spre ordet og inviter med deg ein eller fleire.