Kulturlandskapssenteret i Telemark

Om

Kulturlandskapssenteret tek på seg føredrag, kulturprogram og omvisingar i det nasjonalt utvalde kulturlandskapet i Hjartdal og Svartdal. Ingvill Marit Buen Garnås brukar sin bakgrunn både som naturforvaltar og som kvedar (folkesongar) i si formidling.

Ingvill lærer villig vekk om artsrike slåtteenger, frodige haustingsskogar og kulturminnearv knytt til bygningar og spor i landskapet. Det heile krydrar ho med folkemusikk- og forteljartradisjon med rot i det same landskapet.

Det er ikkje utan grunn at vegen gjennom bygdene Hjartdal, Svartdal og Flatdal har fått namnet Sogevegen (Landlore Lane), for soger er det nok å ta av! Dei handlar om landskap og levde liv, så vel som age og overtru. Bondeopprøret i 1540, alle folkeminnesamlarane og kunstnarane som kom, er også spennande forteljingar frå denne myteomspunne delen av Telemark – Mytiske Telemark.

Alle er velkomne til å ta kontakt. Grupper etter avtale. Me kan også gjera avtaler i samarbeid med fleire aktørar i Mytiske Telemark/Telegardar.

PS: Av Kulturlandskapssenteret får du lære om landbruk før og no, og ikkje minst kva for verdiar det er verdt å ta med seg vidare frå «det gamle jordbrukslandskapet». Dette passar det godt å kombinere med ein tur til Norsk Industriarbeidermuseum/Verdensarvsenteret si avdeling ved Telemarksgalleriet på Notodden. Der finn de historia om kunstgjødsla - oppfinninga som såg dagens lys i Telemark på starten av 1900-talet, og som skulle føre til ein revolusjon i landbruket verda over.