Telemarkfestivalen 2026 | LaurdagsFOLK

Om

LaurdagsFOLK: Odd Nordstoga, Marie Tveiten, E-76, Onstad/Wallumrød
Laurdag 8. august 2025
Sandvinparken, kl. 19:30
655,-/ 435,- inkl. bill.avg. (Gjeld for heile kvelden på Sandvin)

Telemarkfestivalen inviterer som vanleg til folkefest og laurdagsstemning i Sandvinparken. I år inviterer me til ein real Vest-Telemark-fest med konsertar med Odd Nordstoga, Marie Tveiten, E-76 og Onstad/Wallumrød.

Kl 19:00 - Dørene opnar
Kl 19:30 - Onstad/Wallumrød
Kl 20:00 - Odd Nordstoga
Ca kl 22:00 - Marie Tveiten
Ca kl 23:30 - E-76

Billett til heile kvelden: 655,- inkl. bill.avg.
Billett til kun Marie Tveiten og E-76:  435,- inkl. bill.avg.

Obs! Arrangementet er utandørs. 18 års aldersgrense med vergeordning.

----------------------------------------------------

Kl 19:30 - Onstad/Wallumrød
«Onstad/Wallumrød er ein duo som speler folkemusikk og visesang i ein akustisk setting. Ingeborg Onstad syng og speler langeleik og Elias Wallumrød syng og speler gitar. Dei møttest på Norges Musikkhøgskole og har spelt saman i eitt års tid. 
Musikken er nær og gjenkjenneleg. Dei blander eigne tekstar med eldre tekstar og nye tonar med gamle tonar. Duoen leiker i landskapet mellom tradisjon og nyare musikk med utforsking av formidling, modalitet og instrumentering. 

Kl 20:00 - Odd Nordstoga
Få maktar å skildre poesien i kvardagen slik Odd Nordstoga gjer, utan at det nokon gong blir klisjéfyllt eller svulstig. Han syng om skogen, om hausten, om å lengte tilbake til sommaren – og om dagane som kom og gjekk. Han får oss til å danse sjølv om vi ikkje kan, og til å ville synge med av full hals om denne grisen som står og hyler.

Det er aldri tvil om at denne mannen lever for å spele for publikum, og det er ikkje rart at folk over heile landet har trykt han til sitt bryst, både i høgtid og på fest. Ein konsert med Odd Nordstoga kjennest rett og slett som ei vitamininnsprøyting, anten han står aleine, med fullt band, med andre musikalske gjestar eller med strykeorkester.
Odd er ein slags nasjonalleverandør av kvalitetsmusikk, og når han legg ut på turné, er det med både gamle og nye hits i skreppa. 

Ca kl 22:00 - Marie Tveiten
Marie Tveiten frå Seljord er Telemark si nye popstemme. Ho skriv låtar på Vest-Telemark-dialekt, med utgangspunkt i kvardagslege situasjonar og kjensler – som å vente på nokon som ikkje bestemmer seg, eller å lære seg å lese kjærleik i handlingar heller enn i ord.

Songane hennar er melodiske og direkte, med tydelege bilete og refreng som set seg raskt. Mange har kanskje allereie høyrt henne på radio med låta «Heilt tilfeldig», som markerte starten på hennar soloprosjekt. Debutalbumet er venta å kome i løpet av året.

Musikken gir både energi og rom for ettertanke, og vil gli naturleg inn i seinsommarkvelden. Og kven veit; kanskje tek ho med seg hardingfela òg? 

Ca kl 23:30 - E-76
E-76 er eit smått legendarisk band frå Vinje og Midt-Telemark, stifta i 1991, og var eit av dei fyrste banda som laga fengande køntrirock på dialekt. Sidan den gong har dei halde fast ved sjangeren, og musikken deira når stadig ut til nye generasjonar som elskar det herlege samspelet mellom tekst, melodi og energi.

Det viktigaste for E-76 har alltid vore å levere festmusikk som får folk i godt humør. Repertoaret deira vrimlar av allsong-favorittar som «Dån Johan», «Asfaltcowboy», «Ingen som kjem til meg i kveld» og ikkje minst «Bøgata by night», songar som har festa seg i folk sine minne og som har ljoma ut av høgtalarane i mange festlege lag. Ein konsert med dei er kort og godt ein garanti for god musikk, allsong og ekte feststemning.

Dei har laga herleg kaos og påskefest på The Bull inn i mange år. Laurdag 8. august parkerer dei kanskje landets kulaste og gulaste bandbil utanfor Sandvin, og vil levere ei perfekt avslutning for det som garantert blir ein festkveld av rang i Sandvinparken. 

Velkomen!