Vinjestoga

Om

I Vinjestoga kan ein oppleve og høyre forteljingar om livet og kunsten til den kjende forfattaren og journalisten Aasmund Olavsson Vinje.

Vinje blei født 6. april 1818 i Vinje og døydde 30. juli 1870 på Gran i Hadeland. Han vaks opp på denne vesle plassen.

Stoga er open for besøkande om sommaren, og grupper kan tinge omvising med kåseri og song framført av familien Nordstoga.

Framleis står mykje av interiøret att frå den tida då Aasmund og familien hans budde i Vinjestoga. Her er mellom anna seng, bord og stolar, samt bjølla som Lykle, mor til Blåmann truleg bruka. Noko har komme til i seinare tid, til dømes skrivepulten Aasmund bruka då han jobba i Justisdepartementet.

Andre gjenstandar er ei skreppe og ei kiste, samt eksemplar av ”Dølen” - Vinjes eige tidsskrift, samt diverse brev og skrifter.

Aasmund Olavson Vinje
Som liten skal Aasmund ha vore noko for seg sjølv. Han kunne parodiere presten i bygda, eller ha høgtlesing for slekt og vener. Leselysta var stor allereie då han var gut. Då han hadde lese Bibelen, Holberg, Petter Dass og Snorre, var det ikkje meir å finne i heimen. Då måtte han ty til presten, som kunne låne han bøker.

Då han var konfirmert, reiste Aasmund frå Vinje for å gå på skule. Han kom likevel attende fleire gonger. Ein periode var han også omgangsskulelærar i bygda.

Frå å vere ein fattig husmannsgut vart Aasmund Olavson Vinje ein av våre fremste diktarar. Han skreiv mellom anna ”Blåmann”, ”Du gamle mor”, ”Den dag kjem aldri”, ”Storegut”, ”Ved Rundarne”, ”Tyteberet” og ”Ferdaminne”.

Gjennom skrivinga bidrog Aasmund Olavson Vinje, saman med Ivar Aasen og Arne Gardborg, til å bygge opp nynorsken som eige skriftspråk.

1858 – 1870 gav han og ut sit eige frie og uavhengige blad – ”Dølen”, og har i ettertid vorte reikna som Noregs fyrste moderne journalist.

Museet er ope i sommarsesongen.

Det er ikkje kortterminal på Vinjestoga. Ta med litt ekstra klede.

Ta kontakt med Vest-Telemark Museum for gruppeomvising utanom sesong.

Skular og andre grupper kan utanom sesongen bestille omvising, forteljing og song av folkemusikar Aasmund Nordstoga her ved Vinjestoga.