Sommarutstilling med Knut Flatin i Kviteseid

Om

Knut Flatin er årets utstillar i Utsondhalli på Kviteseid bygdetun. Målaren og grafikaren frå Seljord kan sjå tilbake på eit langt og aktivt kunstnarliv. Han debuterte som 19-årig kunststudent med teikning på Statens høstutstilling i 1967. 

I dag er han representert med arbeid i fleire faste galleri og samlingar, m.a. Nasjonalgalleriet, Riksgalleriet og Norsk kulturråd. 

Vegen frå ung, talentfull bygdekunstnar med røter i folkekunst og folkemusikk, til kunstnar med eit lyrisk abstrakt formspråk har tildels vore utfordrande. I ein periode arbeidde Knut Flatin figurativt, men inspirasjon frå studier, reiser og tendensar i tida prega han etterkvart meir og meir. 

Naturoppleving, musikk og inntrykk frå reiser har vore, og er framleis viktige inspirasjonskjelder for bileta hans. Flatin meiner sjølv at det er nærliggande å samanlikna arbeidsmåten og tilnærminga med musikalske komposisjonar og uttrykk:

«Med komposisjon meiner eg fordeling av farge og valørar, slik at det oppstår spenning og liv. Stikkord her er ei blanding av kontroll, spontanitet og eksperiment, samt harmoni og disharmoni. Fargen er ei berande kraft. med farge kan det meste seiast - og er dette intererssant for andre så oppstår dialog».

77-åringen hadde separatutstilling sist på Galleri Heer i Oslo hausten 2021, og i Låvegalleriet på Nutheim i 2019. Ein kan og nemne at det er omtrent 50 år sidan han hadde separatutstiling i Seljord kunstforening for fyrste gong. 

Utstillinga i Kviteseid er tilgjengeleg i bygdetunets opningstider; tirsdag til sundag kl. 11-17 i perioden 25. juni til 14. august 2022.

Merk at opningsarrangementet for sommarutstillinga blir sundag 19. juni kl. 13.00!

Velkomen!