Jettegrytene

Om

Viktig Informasjon!
Agder Energi melder at vassføringa i Jettegrytene vil bli unormal stor til og med 7.juli, på grunn av at arbeidet på Dynjanfoss kraftstasjon ikkje er sluttført. Agder Energi kan heller ikkje garantere at arbeidet blir ferdigstilt til denne datoen, men dei gjer alt dei kan for å klare dette.

Veglaget for Espestøylvegen opplyser om at vegen inn til Jettegrytene vil vere stengt i heile sommar, grunna dårleg vegstandard.
Det vert arbeidd med ein plan for å ruste opp vegen, men dette vil tidlegast kunne bli gjort hausten 2020. Det vil vera mogleg å sykla inn (6-7 km) eller følgje ein stig frå bommen til fots som er eit par kilometer.

Jettegrytene er runde eller lange fordjupningar i fast fjell. Dei oppstår ved erosjon av vatn som har sett steinar og grus i roterande rørsler. Jettegryter finn ein oftast i stryk og fossar, der vatnet har stor fart og dannar kvervlar. Jettegryter finn ein også på stader der det no ikkje er elvar. Desse erlaga av smeltevatn under istida. Jettegrytene kan bli fleire meter i diameter og 10-20 meter djupe.

Elva Fyresåna har gjennom uminnelege tider snurra rundt med stein og grus i elveleiet, som sidan er blitt regulert for straumproduksjon. Før kraftutbyggjarane gjekk til verket, var jettegrytene ein godt verna løyndom under vatnet. Fyrst då ein stor del av vassmassane blei lagt i røyr, kom dei runde fordjupningane i elveleiet til syne. Dette naturfenomenet finn ein heilt sør i kommunen, ved den vesle bygda Eikhom, ei mil frå Telemarksvegen. Det er fylkesveg fram til kraftstasjonen. Der må du betale parkerings-/vegavgift. Avgifta skal skaffe det økonomiske grunnlaget mellom anna til vedlikehald og opparbeiding av parkeringsplass.

Ynda badeplass

Jettegrytene ligg i ein trong dal med berg på båe sider, der sola verkeleg får tak. Det brenn under nakne føter på fjellgrunn! Ikkje rart at dette i årevis har vore ein ynda badeplass for bygdefolk. Grytene er nærast som varme kjelder å rekne. Jettegrytene har vore ein godt verna løyndom for dei fleste. Ein heilsides reportasje i Aftenposten om dei flotte fjellformasjonane, endra dette ganske så drastisk. Staden vart dessutan kåra til årets badestad 1999 av NRK Telemark, Vestfold og Buskerud. Hugs! Dette er eit område på bare 300 meter, med gryter og sklier, nesten som eit naturleg sommarland Det er difor svært sårbart: Skulle nokon lage bål på svaberga, risikerer ein at fjellet slår sprekkar. Ver naturvenleg, ikkje legg att søppel og pass godt på badeperla vår. På førehand takk.