Ja takk - begge delar!

Om

Frå 5. januar til 15. mars 2015 synte museet i Eidsborg ei fleirmedial utstilling om musikken og historia til Noreg sine fem nasjonale minoritetar: jødar, kvenar, rom, romanifolket og skogfinnar.

I utstillinga møter me musikarar som utforskar sine musikalske røter saman med moderne musikalske uttrykk. Det er jødisk rap, skogfinsk blues og kvensk pop, men også urgamle ritual og tradisjonsmusikk som blei overlevert gjennom mange generasjonar.

Musikken speglar dei gamle kulturane, men også den mange hundreår lange undertrykkinga minoritetsbefolkninga er blitt utsett for, spesielt under «fornorskingspolitikken», i okkupasjonstida og heilt fram mot 1980-talet.

Bileta ovan for syner m.a. den jødiske fiolinisten Jacques Maliniak og den kvensk-samiske artisten Kristin Mellem.

Jacques Maliniak var kjent som komponist og orkesterleiar i Noreg på 1920- og 1930-talet. Han blei sendt til Auschwitz saman med mange andre norske jødar i 1942 og døde der. (Foto: Det jødiske museum i Trondheim)

Kristin Mellem (f. 1965) er busett i Tromsø og ser seg sjølv i ljos av tre tradisjonar: den kvenske, den samiske og den norske. Ho er både komponist og felespelar og leiar folkemusikkgruppa «Vajas» (samisk for ekko). (Foto: Gunnar Mellem).

Utstillinga er laga av Ringve Musikkmuseum i Trondheim.

Sundag 22. februar kl 16 heldt Kjell Bitustøyl eit føredrag om samanes kulturtradisjon i Vest-Telemark.