Bygningsvernstenesta og bygningsvernsenteret

Bygningsvern Telemark er ei rådgjevingsteneste som:

•   tilbyr private eigarar av verneverdige hus ei gratis fyrstegongs synfaring med råd om tiltak.
•   tilbyr private eigarar av verneverdige hus informasjon om tilskotsordningar.
•   arrangerer kurs, samlingar og seminar for både huseigarar og handverkarar innan det tradisjonelle handverket.
•   arbeider for å styrke det tradisjonelle handverksmiljøet gjennom å arrangere samlingar med fagleg innhald og å bidra til nettverksbygging.
•   ynskjer å bidra til formidling av kunnskap om eldre byggjeskikkar og bygningskultur i Telemark
•   Vi tilbyr også våre tenester til kommersielle aktørar og til kommunar i Telemark mot betaling. Fyrstegongs synfaring for private huseigarar er gratis. Arbeid utover fyrstegongs synfaring og arbeid for kommunar og kommersielle aktørar fakturerast 850 kroner timen. Køyregodtgjering etter statens satsar kjem i tillegg.

Bygningsvernsenteret på Vest-Telemark museum

Immateriell kulturarv er levande tradisjonar og praksisar som blir overført mellom menneske og til nye generasjonar. Dette inkluderer mellom anna kunnskap og ferdigheitar knytt til tradisjonelt handverk.
Vest-Telemark museum ser bevaring og formidling av dette som ein del av sitt samfunnsoppdrag.
Bygningsvernsenteret spring ut av museets eiga handverksavdeling for vedlikehald av dei mange freda og verneverdige bygningane til Vest-Telemark museum.
Bygningsvernsenteret har brei kompetanse på trebygningar. Bygningsvernsenteret har ein stor og moderne verkstadhall, eiga sag og eit stort lager for materiale og historiske bygningsdelar i Eidsborg. Bygningsvernsenteret er vidare ein arena for kurs i tradisjonelle handverk.
Bygningsvernsenteret på Vest-Telemark museum er tilknytt ein bygningsvernrådgjevar som tar oppdrag i heile Telemark.
Rådgjevingstenesta starta som eit pilotprosjekt i Vest-Telemark i 2020. Frå og med sommaren 2022 har vi dekt heile Telemark med finansiering frå fylkeskommunen.