SKY CRASHERS - Brørne Hemmestveit og Aurora Ski Club of Red Wing

Om

To kongepokal-vinnarar frå Morgedal utvandra til USA på 1880-talet - og skapte sjølve hoppsporten. I år kan du sjå utstillinga om brørne Hemmestveit og «Red Wing style»!

I sesongen 2026 skal Norsk Skieventyr vise utstillinga «SKY CRASHERS - Brørne Hemmestveit og Aurora Ski Club of Red Wing».
Rett etter at dei vann kvar sin kongepokal i Husebyrennet - høvesvis i 1886 og 1888 - utvandra brørne Mikkel og Torjus Hemmestveit frå Morgedal til USA.
«Snow-shoeing» (skigåing) og ikkje minst skihopp var heilt ukjende aktivitetar «over there»; det var berre skandinaviske innvandrarar som dreiv med slikt. Mikkel Hemmestveit viste fram kombinert-kunstane sine for alle på vinterkarnevalet i Minneapolis/St. Paul i 1887, og imponerte stort ved å hoppe 11,3 meter i skibakken i småbyen Red Wing, ikkje langt unna.
Entusiasmen for skihopp spreidde seg lynraskt i alle dei «skandinaviske» delstatane. Berre i Minnesota oppstod det 34 skiklubbar i løpet av få år.
I 1888 kom også Torjus Hemmestveit frå Morgedal til USA.
Som medlemmar av Aurora Ski Club of Red Wing blei Mikkel og Torjus USAs første skihopp-stjerner. Verdsrekordane deira på 31,1 (1891) og 31,4 meter (1893) blei ståande heilt til 1905.
Brørne skapte «Red Wing style», ein rak hoppstil utan stav, basert på Sondre Norheim sine Telemarks-hopp ein generasjon tidlegare. Stilen blei verdskjend og utgangspunkt for all hoppsport sidan.

Brørne opplevde både triumfar og tragediar i USA. Mikkel reiste attende til Noreg, medan Torjus blei buande. I 1928 fekk dei Holmenkollmedaljen saman.
Utstillinga vil fortelje amerikansk skihistorie med bilete, gjenstandar og film. Opningstilstelling blir sundag 3. mai. Då blir det også konsert med Ottar Kåsa og Laura Ellestad; «Hardingfela i Nord-Amerika». Høve til å spise middag i mellom. Me kjem tilbake med meir informasjon seinare.

Norsk Skieventyr har ope kl. 10-17 alle dagar mellom 1. mai og 15. september. Me tek i mot gruppebestillingar heile året.