Sveinung Svalastoga - sommarutstilling 2026 på Dyre Vaa-samlingane

Om

Sommaren 2026 er kan du bli kjent med den særeigne kunstnaren Sveinung Svalastoga (1881-1938) frå Rauland. Då blir det utstilling på Dyre Vaa-samlingane med verk frå samlinga til Vest-Telemark museum.

Sveinung Svalastoga vaks opp på ein av dei største gardane i Rauland. Det var eit liv prega av hardt arbeid i ei tid der få hadde råd til å tenkje på kunst. Sveinung heldt likevel på gutedraumen, og utdanna seg til biletkunstnar. Sveinung var elev på skulen til Harald Brun i Oslo i 1904 - 1905. Samstundes gjekk han på kveldskurs ved Den kongelege teikneskule. I 1909 studerte raulendingen ved N. N. Dorphs målarskule i København.
Sjølv om Sveinung Svalastoga reiste ut og fekk nye impulsar, såg han på seg sjølv som ein bygdekunstnar. Etter utdanninga etablerte han seg på Running, ein gamal plass under Svalastoga som han kalla «Ura». 

I ung alder pådrog Sveinung seg ei alvorleg skade i den eine foten. Foten kom til å plage han resten av livet. På eit tidspunkt måtte han gjennom fleire operasjonar på Rikshospitalet. Det blei starten på ein lang rekonvalensens. Sveinung låg på ivistoga i Svalastoga etter sjukehusopphaldet. I denne perioden tok han til å måle veggane på ivistoga. Han måla «Påskemorgon» på den eine veggen. Mange meiner at dette er det beste han har måla. Han fortsatte med å dekorere veggar og tak, og utsmykkinga av barndomsheimen var ferdig i 1925. Arbeidet førte til at han fekk i oppdrag å dekorere nybygde Møsstrond kyrkje i 1927. Dette blei det store gjennombrotet som kunstnar. 

Blant andre arbeid som Sveinung Svalastoga står bak kan ein nemne «Draumkvede»-salen på kommunehuset i Rauland, altertavla til Tuddal kyrkje og utsmykking av peisestoga til fylkesmannsbustaden i Skien. Han fekk eit større oppdrag med å dekorere kyrkja i Hjartdal, men arbeidet blei ikkje fullført. Han viste også kreative evne i treskjering og dikting. Sveinung Svalastoga fekk på ny helseproblem, og døydde på sjukehus i 1938, 57 år gamal. 

Utstillinga er tilgjengeleg i museets opningstider.