Lugar-Lars og andre figurar - spikkekunst frå Øyfjell og Ytre Vinje

Om

Sommaren 2025 kan du sjå «Lugar-Lars og andre figurar - spikkekunst frå Øyfjell og Ytre Vinje» i samlingshuset på bygdemuseet i Øyfjell.

130 figurar er samla inn totalt, og det er Magne Ljosdal, som du óg kan møte som museumsvert i Øyfjell, som har stått i bresjen for utstillinga. Den rommar lokal spikkekunst og viser alt frå dyrefigurar som fuglar og hestar til små figurgrupper.
Dei utstilte objekta er i hovudsak eigd av private samlarar. Her finn du arbeid forma av nevenyttige utøvarar som Steinar Hovden, Talleiv Nystog og Bjørn Eivindsson Surgrav. Jostein Rorge og Gjermund Drivarbekk er eksempel på spikkekarar frå vår eiga tid, medan Guro Sveinsdotter Rorge var noko så sjeldan som ei kvinne som spikka. Ho var tenestejente fødd i 1882. Det er difor moro å ha med ein hest som Guro har laga. 

Olav H. Tveito er mannen som har forma Lugar-Lars og ein skokk med andre finurlege figurar. Han var mest kjend som handelsmann og felespelar. Det er mindre kjent at han óg var ein særs dyktig treskjerar, med stor sans for humor. Nokre av arbeida hans var utstilt på Handelstemnet i Skien i 1931 og 1932. Tveito var også representert i Kunstnernes forening i Kristiania. 

Utstillinga kan kanskje freiste nokon til å ville uttrykke seg kreativt gjennom treskjering og spikking, men fyrst og framst er dette ei utstilling til å bli i godt humør av.

Utstillinga er tilgjengeleg i museets opningstider.